रगत अभाव सम्बोधन गर्न रास्वपा चाँगुनारायण र रेडक्रस भक्तपुरबिच समझदारीः प्रत्येक वडामा रक्तदान सञ्चालन गरिने

पछिल्लो समय देशव्यापी रूपमा देखिएको रगतको चरम अभावलाई सम्बोधन गर्न राष्ट्रिय स्वतन्त्र पार्टी (रास्वपा) चाँगुनारायण नगर समिति र नेपाल रेडक्रस सोसाइटी, भक्तपुर जिल्ला शाखाबिच एक महत्त्वपूर्ण द्विपक्षीय समझदारी पत्रमा हस्ताक्षर भएको छ । शुक्रबार आयोजित एक विशेष समारोहका बिच समझदारी पत्रमा रास्वपा चाँगुनारायण नगर सभापति रोशन थापा र नेपाल रेडक्रस सोसाइटी, भक्तपुर जिल्ला शाखाका सभापति रामेश्वर थापाले हस्ताक्षर गर्नुभएको हो । सम्झौता अनुसार रास्वपा चाँगुनारायण नगर समितिका मातहतमा रहेका सम्पूर्ण वडा समितिहरूले रेडक्रसको प्राविधिक सहयोगमा आ–आफ्नो वडामा व्यवस्थित र नियमित रूपमा रक्तदान कार्यक्रमहरू सञ्चालन गर्नेछन् । पछिल्लो समय अस्पतालहरूमा रगतको माग अत्यधिक बढेको तर आपूर्ति कम भई बिरामीहरूले सास्ती भोग्नुपरेको अवस्थालाई ध्यानमा राख्दै यो अभियान सुरु गरिएको बताइएको छ । कार्यक्रममा बोल्दै दुवै पक्षका प्रतिनिधिहरूले रेडक्रस र रास्वपाबिचको यो संस्थागत सहकार्यले चाँगुनारायण नगरभित्र स्वयंसेवी रक्तदानको भावना अभिवृद्धि गर्दै मानवीय सेवा र जीवन रक्षाका क्षेत्रमा ठूलो योगदान पु¥याउने विश्वास व्यक्त गरेका छन् । यसै अभियान अन्तर्गत भोलि (शनिबार) रास्वपा चाँगुनारायण वडा नं. ८ समितिले पहिलो रक्तदान कार्यक्रम आयोजना गर्दै छ । सुडाल स्वास्थ्य चौकी, मिश्रेकोटारमा बिहान ७ बजेदेखि सुरु हुने उक्त कार्यक्रममा उपस्थित भई रक्तदान गर्न आयोजकले सम्पूर्ण नगरवासीहरूमा हार्दिक अपिल पनि गरेको छ ।