भक्तपुर, भदौ २२ गते। रसुवाको भोटेकोशी नदीमा आएको विनाशकारी बाढीमा परी ज्यान गुमाएकाहरूको सम्झनामा दीप प्रज्वलन गरी श्रद्धाञ्जली अर्पण गरिएको छ।
बाढीमा परी ज्यान गुमाएका व्यक्तिहरूप्रति सम्मान प्रकट गर्दै ‘महाविनाशकारी बाढी’मा मृतकहरूको आत्माको चिरशान्तिको कामना गरिएको हो। श्रद्धाञ्जली कार्यक्रममा सहभागीहरूले बाढीबाट प्रभावित परिवारप्रति समवेदना व्यक्त गर्दै विपद्मा परेकाहरूको उद्धार, राहत तथा पुनःस्थापनामा सबै पक्ष एकजुट हुनुपर्नेमा जोड दिएका छन्।
भदौ १० गते रसुवाको भोटेकोशी नदीमा आएको बाढीले रसुवासहित नुवाकोट, धादिङ, गोरखा, तनहुँ, नवलपरासी र चितवनसम्म ठूलो जनधनको क्षति पुर्याएको छ। बाढीपछि खोज, उद्धार तथा राहत कार्य जारी रहेको छ।
श्रद्धाञ्जलीका क्रममा दीप प्रज्वलन गर्दै सहभागीहरूले विपद्मा ज्यान गुमाउने सबैप्रति सम्मान र पीडित परिवारप्रति ऐक्यबद्धता जनाएका थिए। साथै आगामी दिनमा यस्ता विपद्बाट हुने मानवीय क्षति न्यूनीकरणका लागि पूर्वतयारी, सूचना तथा पूर्वचेतावनी प्रणालीलाई प्रभावकारी बनाउनुपर्ने आवश्यकता औँल्याइएको छ।
Leave a Reply